الحل لمشكلة المسام الواسعة وتوحيد لون البشرة

أسباب المسام الواسعة
المسام الواسعة دي ممكن تكون طبيعة في البشرة، أو ممكن تظهر نتيجة للحبوب الموجودة في البشرة وعلاجها بطريقة مش صحيحة، وممكن كمان من استعمال الماكياج الكتير بطريقة خاطئة؛ وده لأن فيه بنات وهي بتحطّ الماكياج بتضغط على بشرتها جامد بالأسفنجة، وده بيسبب المسام الواسعة مع الوقت.

من الحاجات المعروفة جدا والمفيدة للمسام الواسعة هي الطماطم، ودي بتعتبر قابض هايل للمسام.

لوسيون البرتقال والليمون
من الحاجات المفيدة كمان للمسام الواسعة هو لوسيون البرتقال والليمون، وده لوسيون هايل علشان تحصلي على بشرة زي الأطفال، وكمان بيدي نصف أو ربع درجة أفتح للبشرة، واللوسيون ده عبارة عن:

المقادير: برتقالة ليمونة كوب ماء
الطريقة:
هناخد بشر البرتقال والليمون ونخلطهم سوا، ونحطّهم مع المية على النار لحد ما يغلوا؛ بحيث إن كوب الماء يقل النصف بعد الغليان.

بعد كده هنصفّي اللوسيون ده ونحطّه في برطمان زجاج، ونخلّيه في الثلاجة لمدة 4 : 5 أيام، ونستعمل منه كل يوم بالليل قبل النوم، أو ممكن بالنهار بس طبعا ما نتعرّضش به للضوء المباشر أو الشمس أو البخار.

واللوسيون ده بيرطّب البشرة جدا وبيغذّيها وقابض هايل للمسام.

كمان من الحاجات القابضة للمسام الواسعة هي مية البنجر، ودي طريقتها إننا بنسلق البنجر، وبعد كده بناخد المية وبنستعملها للمسام، ودي بتكون مفيدة جدا.

ماسك الأرز يقبض المسام ويُفتِّح البشرة
الماسك ده ليه طريقتين: إما بنخلط الرز مطحون مع مية ونسوّيهم على النار زي المهلبية، أو بناخد ملعقة رز عادية على كوب ماء صغير وبنغليهم على النار لمدة 15 : 20 دقيقة وبعدين نصفّيه، وهيطلع سائل لزج ونحطّه في برطمان زجاج، وممكن نخلّيه في التلاجة لمدة من 4 : 5 أيام، ونستعمل منه يوميا، وده بينعم البشرة جدا وبيفتّحها وقابض هايل للمسام.

مكعبات الثلج بالخيار
فيه حاجة كمان ممكن نعملها للمسام الواسعة هي مكعبات التلج، بس تكون من مواد معينة؛ يعني مثلا ممكن نعمل مكعبات تلج من عصير الخيار ونستعمله يوميا، أو ممكن ماسك الليمون والمية وحبوب اللقاح وده عملناه في حلقة فاتت، بس أنا مش بانصح إننا نحط ماسكات متلجة على البشرة في فترة الصبح؛ يعني ممكن نحطّها ساقعة لكن مش متلجة، ونخلّي المكعبات دي بالليل بعد ما تكون البشرة اتعرّضت للشمس والإجهاد، وكمان نحاول قبل ما نحط عليها المكعبات إننا نعرّضها لكمية مية كتيرة؛ زي مثلا إننا ناخد شاور أو نغسل وشنا كتير؛ لأن ماينفعش تكون البشرة سخنة أو دافية من الشمس ونعرضها فجأة للتلج.

روتين استخدام ماسكات المسام الواسعة
أهم حاجة إننا ماينفعش نستخدم كل الماسكات دي مع بعض؛ يعني هنختار ماسك واحد ونستمر عليه.

بالنسبة للمرأة العاملة أو الطالبة ممكن تستخدم ماسك الرز أو الخيار أو مية الورد لو هتحط منه الصبح، لكن ماتستخدميش الليمون؛ وده لأن ماسك الرز بيجف بسرعة على البشرة، وبيكون سهل وسريع إننا نعمله الصبح، وبعد كده تقدر تحط ماكياج خفيف قبل ما تنزل.

بالنسبة للماسكات اللي ممكن نحطها بالليل هيبقى ماسك الليمون أو الطماطم أو البنجر، وده طبعا علشان ماينفعش نتعرّض بيهم للضوء زي ما قلنا.

توحيد لون البشرة وتفتيح البقع الغامقة
أهم حاجة علشان نعالج المشاكل دي هي الاهتمام الشديد بالعناية والنظافة الشخصية؛ لأن دي من الحاجات اللي بتساعد إن مايتراكمش حاجات على الجلد أو بين ثنايا الجلد، واللي بتسبب البقع الغامقة.

لازم ناخد شاور مرتين يوميا ونستخدم الليفة المصرية العادية، ونستخدمها بشكل دائري في المناطق اللي فيها دهون زيادة، وده بيساعد في تنشيط الدورة الدموية وتنضيف البشرة، كمان الليفة المغربية نستخدمها مرة في الأسبوع أو ممكن مرتين بالكتير، ولو هنروح لأماكن فيها سونة وبخار يبقى هنعملها مرة واحدة في الشهر.

ودي شوية ماسكات ممكن نستخدمها لتفتيح وتوحيد لون البشرة
ماسك الترمس والردة
الماسك ده مفيد لتفتيح بشرة الوجه والجسم، وكمان بيروّق البشرة، وبيعمل على إزالة الخلايا الميتة من البشرة..
المقادير: ملعقة ترمس ملعقة ردة ملعقة عسل نحل 1/ 4 أو 1/ 2 ملعقة زيت ورد
الطريقة:
هنخلط المكونات ولو هنستخدم زيت الورد يبقى هنخلطه بمية سخنة، أو لو مافيش زيت ورد يبقى هنخلط بمية الورد، ونحط من الماسك على الوجه والجسم.

حاجة كمان بتساعد على تفتيح البشرة؛ هي إننا ناخد شاور كل يوم، وندهن جسمنا بخليط الليمون والجليسرين، وتكون نسبة الليمون أكتر من الجليسرين، ونستمر عليه لمدة شهر، وده هيساعد جدا على تفتيح الجسم.

ماسك الفجل للبقع الغامقة
المقادير: 1/ 2 كوب عصير فجل 1/ 2 كوب عصير ليمون 1/ 2 كوب شرش لبن زبادي (والشرش ده هو المية اللي بتطلع من الزبادي، خاصة الزبادي البلدي بعد ما نشيل طبقة القشطة ونسيبه شوية بره التلاجة).
الطريقة:
هنخلط مقادير متساوية ونحطّه في برطمان زجاج، ونسيبه في التلاجة لمدة 48 ساعة وبعدين نبدأ نستخدمه.
والماسك ده نقدر نستخدمه لبشرة الوش، وكمان لأي بقع غامقة في الجسم بس لو هنحطه على الوش بنسيبه لمدة 15 : 20 دقيقة، وبعدين نشطفه وندهن وشنا زيت لوز حلو، أما بالنسبة للجسم هنركِّز على المناطق اللي فيها بقع ونسيبه لمدة أكتر يعني ممكن نصف ساعة.

عايزة أقول لكم إننا لازم نفرّق بين المناطق الغامقة؛ زي الكوع والركبتين، وبين المناطق اللي فيها بقع، وكل حالة بيبقى ليها الماسكات الخاصة بها؛ يعني ماسك الفجل بنستخدمه للبقع فقط، كمان ماسك الخميرة مع العسل بيروّق البشرة وبيشيل الحبوب من الجسم.

bounce

» قناع الطمي والعسل.. خلطة 2011 لشد وتنظيف البشرة